Věra Chytilová

Věra Chytilová (1929 – 2014) é seguramente a directora máis vangardista da Nova Vaga checa dos anos sesenta. Mentres traballaba como claqueta no estudo Barrandov, foi admitida na escola de cinema FAMU de Praga. De 1957 a 1962 estudou dirección co veterano director de cinema checo Otakar Vávra. Nos seus traballos académicos, viuse influída polos documentais cinéma-vérité e o cinema europeo formalista moderno. O mesmo ocorreu coa súa primeira longametraxe, Falemos doutra cousa (1963), que alterna entre a vida dunha ximnasta real coa historia ficticia dunha ama de casa. Chytilová é probablemente máis coñecida pola súa segunda película, o himno dadaísta, surrealista e feminista de desbordante imaxinación As margaridas (1966). Tras a invasión soviética de 1968, non se lle permitiu rodar longametraxes durante anos. Regresou coa aceda comedia costumista O xogo da mazá (1977). A súa sátira sobre a realidade social da comunidade socialista titulada Panelstory (1979) foi tan provocadora que só puido verse nos arredores de Praga. Tras a caída do réxime comunista, Chytilová realizou documentais de gran calado e catro longametraxes máis que satirizaban o capitalismo e revelaban a súa postura moral, que continuaba sendo igual de firme.