Juraj Herz
De pais xudeus, Juraj Herz (1934 – 2018) foi sobrevivente do Holocausto no campo de concentración de Ravensbrück. Tras cursar estudos secundarios en Bratislava, estudou fotografía na Universidade de Artes Aplicadas da cidade, e posteriormente dirección e marionetas na Facultade de Teatro da Academia de Artes Escénicas de Praga (DAMU) xunto a Jan Švankmajer. Tras finalizar os seus estudos, permaneceu en Praga para traballar no Teatro Semafor e nos Estudos Barrandov. Herz foi un director de cinema autodidacta. A súa primeira experiencia no cinema foi como director de segunda unidade ás ordes de Zbyněk Brynych (Transporte desde o paraíso, 1962) e Ján Kadár (A tenda na rúa Maior, 1965). Debido a que asistira á DAMU e non á súa escola de cinema irmá, a FAMU, Herz non formou parte inicialmente do núcleo de directores que formarían a Nova Vaga Checoslovaca. Herz saltou á fama coa súa película de 1969, O incinerador de cadáveres, baseada nunha novela de Ladislav Fuks e protagonizada polo actor checo Rudolf Hrušínský no papel dun demente encargado dun crematorio que colabora cos nazis durante a Segunda Guerra Mundial. En 1972, gañou o premio á mellor película, actor e fotografía no Festival de Cinema de Sitges. Inmediatamente prohibida polos censores comunistas tras a súa estrea, O incinerador de cadáveres non volveu verse en Checoslovaquia ata despois da Revolución de Veludo de 1989, pero alcanzou unha ampla aclamación internacional e un status de culto. Juraj Herz foi coñecido sobre todo polo seu traballo no cinema de terror, xénero pouco transitado polo resto de directores checoslovacos durante o período comunista. Entre os seus outros filmes de terror inclúense o drama de asasinatos Morgiana, de 1972, e unha reinterpretación gótica do conto de fadas A Bela e a Besta (Panna a Netvor), de 1978. Herz emigrou a Alemaña en 1987. As súas últimas películas importantes foron o «thriller» paranormal Darkness (T.M.A., 2009) e Habermann (2010), un drama bélico sobre a expulsión de alemáns de Checoslovaquia tras a Segunda Guerra Mundial.
